يا قصر دنيانا ....ويا كثر الأسباب

يا الله يا منزل تبارك والأحزاب = يا عالمٍ بالغيب واللي يخفانا

يا اللي خلقت ادم من الطين وتراب = منك .. إليك المبتدأ ومنتهانا

يا فارجٍ للعبد ضيقات واكراب = يا مرسل محمد لدينك هدانا

أعمارنا كُتبت مع الغيب بكتاب = مهما فعلنا ما تجيء في هوانا

حكم القدر على المخاليق غلاب = لو دونه الدانيين كلٍ تفانا

العمر دين وصاحب الدين طلاب = ولابد يومٍ يأخذ اللي عطانا

والموت حق ولا عن الحق مهراب = لوعنه نلجأ للسماء ما تحمانا

لو بينك وبينه يحيلون الاقراب = لا تزود ولا تنقص لحظه بقضانا

لا راح غالينا ذهابٍ بلا إياب = عجلٍ رحيله بيننا ما توانا

نبكي ويبكي مثلنا كل منصاب = الله يصبرنا على ما بلانا

الله من حزنٍ على القلب سكاب = منه المشاعر والخلايا تشانا

يا الله تلهمنا الصبر عند الاكراب = وتجبر مصيبتنا وتحسن عزانا

باللي خذاه الموت منا وهو شاب = لا عاد يومٍ بالخبر عنه جانا

موتك يا ماجد علةٍ ما لها اطباب = خذاك منا الموت غصبٍ دهانا

رحلت وعقبك داخل القلب لهاب = فرقاك تلحق يا ضنيني مدانا

لو تنفدى بالمال والحال تنجاب = أفديك يا نبع الوفاء والحنانا

كل المشاعر بي تهاوت والأعصاب = وعليك يا ماجد تزايد بكانا

تفوح فوح الماء على نار مركاب = عبرات من داخل ضلوعٍ تحانا

تذرف بها عينٍ بكت غاليٍ غاب = ذريف هملولٍ سحابه غشانا

يا الله عسى في مرقده نفح الاطياب = وأزهار من الفردوس يمه تدانا

وعلى اللحد من رحمتك تفتح أبواب = باب الرضا من والدينٍ حزانا

رضاي ورضا أمه عن النار حجاب = أمين يا منزل كتاب البيانا

لك نبتهل يا رب في كل محراب = نرفع يدينا لك تلبي دعانا

يا قصر دنيانا ....ويا كثر الأسباب = ويا سرع فرقانا عقب ملتقانا

محمود براك البراك

صح لسانك يا أبو ماجد
الله يرحمه ويسامحه ويدخله جنات النعيم

صح لسانك يا شاعرنا المحبوب
الله يرحمه ويغفر له

صح لسانك يا أبو ماجد يا رمز الجوف الثقافي بالمهرجانات
الله يرحم ماجد ويغفر له

» تساقط الشعر .. الأسباب والعلاج